政情：民協情侶被撬 齊過檔白鴿
近年民主黨（白鴿黨）撬走唔少民協嘅區議員，年初就有一名小花轉投白鴿黨，原來係受到愛的感召，邊位咁勁？九龍城區議員黎廣偉（Kenny）同深水埗區議員鄒穎恒（Zoe）都係前民協成員，原來佢哋喺一五年區議會選舉勝出上任後就譜出戀曲，再前後腳過檔白鴿黨。
黎廣偉致詞公開多謝女友
Kenny同白鴿黨立法會九龍西議員黃碧雲嘅聯合辦事處尋日開幕，Kenny喺致詞尾段突然公開多謝女友Zoe，令大家目光聚焦喺Zoe身上，而獲邀出席嘅發展局局長黃偉綸同食物及衞生局局長陳（啟聿）始及後致詞時都打趣向Zoe打招呼。
今次係Kenny首度公開多謝女友，搞到Zoe笑得好尷尬，話兩人由做同事開始，上任後先一齊。咁有段時間唔同黨點算？佢話講明大家黨入面嘅事唔好講，佢唔想知。至於係咪男友帶過檔，佢就笑稱，兩個黨理念唔係相距好遠，大家同黨友都有傾過嘅。