中環出更：黃之鋒同王丹「行埋」搞智庫
八九學運領袖王丹牽頭成立名為「對話中國」嘅智庫，預計喺今年六月四日美國華盛頓正式宣布成立，並喺日前公布首批團隊成員名單，除咗王丹將會出任智庫所長外，香港及台灣均有學運領袖加入成為智庫理事，分別係香港眾志秘書長黃之鋒，同埋台獨分子林飛帆。黃之鋒喺Facebook承認將加入智庫，又盼望喺國際領域嘅公共平台，參與推動民主進程。
台獨分子林飛帆亦有份
據報，智庫「對話中國」希望透過政治分析、政策研究等方面，以推動中國向民主化、自由化方向轉變為宗旨，除咗由十五人組成嘅理事會外，另設有學術委員會及顧問委員會，其中顧問委員會連同召集人共有八人，包括八九學運領袖吾爾開希、曾任新民黨主席葉劉淑儀碩士導師嘅國際著名民主研究學者Larry Diamond。王丹喺Fb預告，會擴充理事會同兩個委員會嘅人員，兩個月後會公布第二批團隊成員名單。
卓妮