政情：約官見面必殺技 邵家臻靠公開發言
身為立法會議員，唔單止要為市民發聲，更要就住不同項目去同政府講數，甚至要追數。雖則議員係可以同班官員朝見口晚見面，都未必一定可以約到傾議題。社福界邵家臻就戲言，做咗年幾議員，終於度到必殺技去約官見面，慨嘆「原來爭取到綠燈加兩秒，都真係唔容易！」
邵家臻話以前約官見面問嘢，次次去信都石沉大海，未必一定可以接觸到對方。而佢就喺二月五日嘅房屋事務委員會上，提及黃大仙下邨一間長者中心，竟然開咗三十七年都欠缺無障礙設施，邀請房署官員陪同落區，會後佢即刻去信署方要求跟進。一個月後，三月十九日房署終於安排人員一同落區研究問題。
話成功過起碼五次
佢又喺另一個委員會上，指出前線社工入新邨服務無落腳點，隨後就可以約到運輸及房屋局副局長蘇偉文會面，目前對方答應安排社工隊支援新屋邨居民，並且會喺本月內一齊去安達邨視察情況。佢話公開講完嘅嘢，政府部門就無得避，形容呢招已經成功過起碼五次，笑稱依家先發現，爭取到綠燈加兩秒真係唔容易，政府真係可以話唔理就唔理。