政情：巴西「睇肉」 長者打針風險高 何啟明關心張宇人
立法會食物安全及環境衞生事務委員會為咗上年出現嘅巴西肉類品質問題，正籌備去巴西聖保羅考察，而考察議員更要提早接種黃熱病預防疫苗。不過，議員何啟明尋日就提醒，議員報名前要多注意打針事宜。咁講，係咪想阻嚇有意參加嘅議員？
何參與否視乎行程
其實何啟明係出於關心議會中嘅前輩，事關佢曾經接到長者有關報名巴西旅行團嘅求助個案，報名後才知悉長者首次接種有關疫苗嘅風險較高，最後花咗一段時間去追討團費，所以對接種呢款疫苗印象深刻。而作為委員會成員嘅佢目前仍未決定去唔去巴西，因為要視乎考察行程安排，直言考察內容唔夠多嘅話，乘搭廿多小時飛機就唔太划算喇！
其實議員張宇人有份聯署要求去巴西考察，但早已領取長者卡嘅佢若然從未接種過疫苗，風險就比一般人高，唔知聽過何啟明忠告後，會否動搖佢參加考察團決定呢？