政情：倡鰂魚涌起樓 姚松炎雙重標準 泛民建制齊炮轟
不少政界人士經常批評本港樓價貴，叫政府快啲做嘢，但當建議喺某一啲地區起樓嘅時候，涉及當區利益，嗰區嘅政界人士又會群起反對，講到尾，都係唔想搞到自己。立法會前議員姚松炎近日建議喺鰂魚涌公園起樓，引起多個喺當區工作嘅政黨反對，包括太古城嘅區議員、民主黨趙家賢以及民建聯同新民黨，而姚松炎更被華富嘅區議員柴文瀚翻舊帳，批評佢曾反對喺自己屋企置富附近起公屋，安置華富邨重建嘅居民，依家又建議喺太古城起基層房屋。睇嚟姚松炎今次真係激嬲成村人啦！
姚松炎近日以房產發展研究中心創辦人嘅身份，無啦啦提出建議，喺鰂魚涌公園一帶起樓，以及喺東區走廊起上蓋接駁海濱。鰂魚涌公園雖然係政府公園，但眾所周知，多數係太古城一帶嘅居民使用，而且喺鰂魚涌公園起樓，極有可能會擋住太古城嘅部分景觀，太古城係東區嘅老牌屋苑，一向係樓市嘅指標之一，擋住海景加上起公屋，自然影響樓價，當區居民梗係超反對啦，喺當區工作嘅民主黨趙家賢、民建聯同新民黨都先後出稿反對姚松炎嘅建議，真係建制泛民嘅團結呀！
曾反對自己屋企附近建公屋
講起港島區起樓，亦令人諗起港島區華富邨重建，原本想喺置富旁起千幾個單位，當時置富有聲音反對，擔心起公屋會令到置富樓價大跌，姚松炎本身住喺置富，亦曾經反對呢個方案。華富嘅區議員柴文瀚都喺社交網站寸姚松炎，話平行時空下，姚松炎反對置富旁興建公屋，接收華富重建戶，計劃因此略被拖延，但同時又主動出擊，提出太古城旁可以起基層房屋，「查實，置富同新華富距離，比較太古城住宅同鰂魚涌公園距離，相差好似唔太大？」姚松炎喺截稿前未有回應。