中環出更：傳統觀念轉變 王賢誌撐綠色殯葬
清明節唔少市民都會去拜祭祖先，東華三院新一屆嘅董事局成員就趁今日清明節巡視佢哋嘅服務單位，先後去咗上環廣福祠、文武廟同埋東華義莊，拜祭嗰度嘅先人。東華三院主席王賢誌（Vinci）就話，東華義莊以前為海外華工提供「原籍安葬」，依家已經冇咁嘅需要喇，對於政府依家提倡嘅綠色殯葬，佢都覺得應該支持，因為就算先人過咗身，會去拜祭嘅通常都係第二、三代嘅後人，所以冇必要好似傳統殯葬咁，佔用塊地咁耐喎。
Vinci覺得長輩思想比較傳統，年輕一輩應該會比較容易接受綠色殯葬。佢又話自己祖籍江西南昌，屋企人已經好少返去拜祭祖先，只會拜祭已安葬喺香港嘅親人。佢認為，大家去拜山，都係先人第二、三代嘅後人，再隔多幾代已經對先人冇乜認識，甚至都唔一定會去拜祭，所以覺得人死後都唔需要佔用塊地咁耐，綠色殯葬都應該支持。
總理馮敬安就帶埋十二歲嘅囡囡Jasmine巡院。佢話囡囡喺英國讀書，由細到大都好少參觀文武廟等傳統廟宇，加上成日都問佢做緊乜，咪帶埋佢齊齊巡院囉。佢又話，雖然自己爺爺嫲嫲同公公婆婆都係土葬，但自己都支持綠色殯葬。因為香港土地太少，土葬費用好貴，以前老人家就比較傳統，一定要土葬，但依家啲人都要面對現實問題接受火葬，綠色殯葬都係趨勢咁話。
文頴怡話家屬意願好重要
副主席文頴怡、總理鄔翁嘉穗、陳黃燕君、徐明華都有到場。文頴怡就話東華三院都有提供綠色殯葬服務，但最重要都係要睇信仰同死者家人嘅意願。
新任總理鄔翁嘉穗假期都出席活動，問佢點解唔帶埋囝囝嚟，佢就話囝囝病咗，所以屋企人都冇去拜山，打算等囝囝好番先，相信先人唔會介意。正所謂有心唔怕遲，只要有心，就算唔係正日拜山都冇問題嘅。
卓妮