「掛羊頭賣狗肉」大家聽得多，但掛船廠招牌行車房之實又聽過未呀？港府渾渾噩噩，地政官僚胡混度日，致使大量官地被霸佔，用於牟取暴利，呢類官地混帳三日三夜都說不完呀！
嗱，本報揭發地政總署喺筲箕灣以年租十二萬元，即平均月租一萬元批出政府土地畀人做船廠，點知有人就「劏」成多個單位分租畀人做車房，估計每月租金收入達到六十萬元，呢啲咁嘅暴利生意，睇怕淨係香港先有。事實上，上述土地規定唔可以從事造船或修船以外業務，車房職員都知經營車房違法，所以現場只係掛住不同名稱嘅「船廠」招牌，掩人耳目，最令人莫名其妙嘅係，醜聞曝光後，地政總署被問到有幾多土地係因為違反短期租約而要被收回，佢哋話冇統計數字喎，擺明心中有鬼，「臭屎密冚」喇！
講真，香港仲有幾多漁民吖，連帶造船、修船都變晒夕陽工業喇，或者紛紛北移搬上大陸啦，但政府無視世道已變，依然以廉價批出土地畀人做船廠，仲要監管不力，被人改變土地用途牟利，有乜出奇啫。本報舊年都揭發過地政總署縱容鴨脷洲一間船廠將修船用嘅泊位改成遊艇泊位，每年穩袋過千萬元嘅醜聞，當記者都發現到霸海、霸地嘅情況，地政總署竟然一問三唔知，係真唔知定扮唔知？咁大筆無本生暴利嘅生意喎，好難唔令人懷疑當中冇不可告人嘅交易，廉政公署可以開快勞查嘞。
話時話，地政總署縱容霸地嘅例子數極都數唔完，唔使講咩，石澳東丫背村就有前高官同富豪過去三十年來不斷霸佔官地，將寮屋擴建成獨立屋，仲起埋私人碼頭添，但地政總署隻眼開隻眼閉，唔係助紂為虐係乜嘢呀！當高官都帶頭霸地，其他人更加有樣學樣，申訴專員公署舊年公布鄉郊一宗私人農地上建屋橫跨官地個案，違規霸佔長達二十年，期間地政總署先後視察九次都視而不見，呢班人每日返工係做咩嘅呢？申訴專員公署直頭鬧地政總署作為土地大地主、土地契約管理人，對違規行為知情而唔作為係行事散漫。睇到喇，地政總署有法都唔執，即係變相鼓勵人霸佔官地啫，全港究竟仲有幾多土地係被人侵佔？成舊四方木咁嘅地政總署巡幾多次都答唔出o架喇。
難為港府開口埋口「地從何來」，又話寸土必爭，講到好似唔填海就一定要毀人家園先有得諗咁，實際上唔係縱容霸地牟利，就係偏袒權貴享用私人遊樂場，唔知幾多珍貴資源未能善盡其用，香港房屋問題愈演愈烈就係咁解！