政情：做投行幕僚長 單日堅唔搞投資
好多前任官員退休後，都會發展另一番事業，懲教署前署長單日堅已經退休三年多，原來佢年初開始加入一間投行，出任首席幕僚長，不過就唔會幫手搞投資嘞，而係會做番啲機構管理嘅事。
管治機構 睇社區項目
佢話以往做嘅事與投資無關，所以唔會參與投資方面嘅事，只會幫忙一啲有關機構管治嘅事宜，自己喺政府工作多年，喺行政同機構管治都有經驗，萬變不離其宗，管人、制度化、紀律等方面，對一間投行都非常重要，佢亦會幫手睇吓啲社區項目，因為以往做開更生工作，對好多社區都好熟悉。
加入投行有乜要申報？佢話要向公司披露自己所有嘅投資，連太太嗰啲都要申報埋，以前都唔清楚有呢啲需要添，好彩太太都好理解，其實佢嘅女都喺金融界工作，佢同個女傾開偈，阿女就話係有需要咁樣申報o架！睇嚟兩父女依家都做埋同一行喎。