政情：日本行山唔知醒 莫乃光趕餐懵
近年行山成為一種潮流，吸引男女老幼加入山系行列，有時仲會衝出香港，專程去外國旅行行山。立法會資訊科技界議員莫乃光（Charles）亦都係行山愛好者，所以近日就飛到日本和歌山縣，挑戰世界遺產熊野古道。
差啲行到抽筋
熊野古道分為五段路，Charles今次只係選擇咗其中嘅中邊路，不過似乎就唔太順利喇，朝早鬧鐘冇響令佢唔知醒，坐JR鐵路再轉巴士嘅時間又接唔啱，最後要成下午一點半先可以起行，時間短之餘仲為咗要喺天黑前趕尾班車離開而行得快停得少，差啲搞到右大腿抽筋，好彩最後冇事，只係唔夠喉啫！
Charles仲話今次day trip欠缺效率，中邊路只係行咗三分之一，仲話如果有伴一齊，由中邊路行到伊勢路就正喇！不過，佢都講到明有機會會再嚟，只係行呢條路線都需要唔少時間嘅。咁下次佢出發前要好好plan吓先，仲要知醒呀！