政情：陳家亮呻科研空間不足難吸醫學教授
香港地「土地問題」除咗影響住屋，牽連甚廣，亦搞到人才輸在起跑線。香港中文大學醫學院院長陳家亮尋日撰文「吐苦水」，曾經有一個非常顯赫嘅英國教授有意加盟中大醫學院，就因為空間不足嘅問題，教授最終選擇去另一鄰近國家教書。對於政府不停強調增加醫科學額，佢無奈地覺得香港要有環境、請得起教授教醫科生都好緊要，直指加醫科生「唔係多個人多雙筷」咁簡單。講真，有條件嘅又點會揀蝸居吖，食物及衞生局局長陳肇始咪以為加醫生學額就得呀！
陳家亮話要確保本地培訓醫科生可以維持世界級水準，增加醫科生人數之餘，都有必要增加優秀嘅醫學教授同老師。過去十年醫科學額增加接近一倍，每個教授要照顧嘅學生數目愈來愈多，已經唔可以再單靠本地醫院管理局嘅醫生去教育下一代醫科生，佢亦唔願見到學生臨床學習同實戰機會減少。於是佢形容自己，成日都要「三顧草廬」咁，去外國招聘教授人才，但你揀人時，人都揀你，早前就有外國教授因為「空間不足」請佢食檸檬。
軟硬件俱欠 病床再多都冇用
英國教授想要幾多空間呢？五千呎實驗室同兩部磁力共振機用嚟研究同教學之嘛！但一提起五千呎，可能好多香港人都覺得唔係啩？！自己間「蝸居」連五百呎都無啦！陳家亮就覺得，平心而論呢位來自英國嘅教授要求唔算過分，從來冇足夠嘅科研空間，又有邊個會想離鄉別井、千里迢迢去香港繼續發展呢？
陳家亮慨嘆，當全世界都爭奪緊醫學教授人才時，香港已經變得愈嚟愈唔吸引，唔係因為醫學水準唔夠高、出唔起銀彈攻勢，而係對比起鄰近亞洲地區，科研硬件上已顯得相形見絀。
公立醫院醫生流失率創十年新高，政府一直講增加醫科生「派定心丸」，但醫生都未齊腳就要十年後、又一個十年嘅醫院重建計劃，加幾千張病床應付需求。陳家亮一句「KO」所謂重建大計：「事實上，冇足夠軟件硬件去栽培人才的話，再多十倍病床也無濟於事。」希望陳肇始睇到院長嘅苦水後，快啲諗辦法去吸引人才啦！