中環出更：緬甸勞工夠平 鍾國斌話吸引港商
復活節假期，立法會都有幾日唔使開會，議員都會乘機去吓旅行或考察。立法會紡織及製衣界議員鍾國斌（Felix）就去咗緬甸幾日，睇吓佢有份推動嘅工業園，佢話工業園依家大部分都係港商進駐，因為緬甸勞工平絕東南亞喎。
助推動工業園 非一帆風順
Felix話喺一二年開始幫手推動呢個工業園，為此去咗十幾次緬甸，依家已經有約七成地方有人買咗或租咗，推動工業園嘅過程中，並非完全一帆風順，因為緬甸曾換政府，喺新舊政府嘅過渡期，有一年多嘅時間令到工業園嘅進展比較緩慢，至於工業園內大部分都係港商，因為內地生產成本太貴，加上中美貿易戰，港商轉為投資緬甸都好正常，緬甸勞工成本平絕東南亞，所以競爭力都相對較高。
今次去緬甸，Felix又去咗幫手搞引入照顧長者嘅護理人員，睇吓幾時落實培育學校，亦有出席新仰光發布會，佢話當地舊城已經爆晒棚，所以緬甸政府要發展新仰光。
卓妮