中環出更：實名制杜絕黃牛 陳湛全：撞期難轉讓
香港嘅黃牛飛問題唔係新鮮事，由早年嘅車飛、船飛，到近年比較多嘅演唱會同楝篤笑，黃牛黨搞到一票難求，更炒至逾萬元一張，令黃牛飛問題再次引起社會關注。有主辦單位採取實名制以圖杜絕黃牛飛，但呢項措施就唔係個個鍾意喇，好似馬主協會前會長陳湛全就話，有時買完飛先出現一啲突發事件，如果用實名制，喺轉讓方面就好麻煩喇！
陳湛全話自己成日要公幹，有時公幹都只係早一兩日先知，但買演唱會飛好多時要早一個月以上買，過往撞期就可以將張飛讓畀朋友，如果採用實名制嘅話，就好大機會浪費咗張飛。佢又話炒賣素來都有，認為限量購買係一個比較可行嘅措施，至少黃牛黨想炒都炒唔到幾多張。
嚴子杰：安排多啲場次減炒賣
香港工業總會青年委員會委員嚴子杰話嚟緊五月會同太太去睇演唱會，唔知佢使唔使買黃牛飛呢？但原來佢唔係準備睇最大型嘅嗰幾場表演，所以應該唔會受黃牛飛影響。但係佢認為黃牛飛問題的確嚴重，係源於主辦單位管理得唔好所致，如果可以就盡量安排多啲場次，咁就有更多嘅飛，炒賣自然就冇咁嚴重。
曾經做過藝員、扮演過哪吒嘅西貢區議員方國珊都好鍾意睇演唱會，仲大鬧黃牛黨離譜兼過分，做過演員嘅佢深明藝人嘅生涯好短暫，好多時候做幾年已經褪色，「你叫我依家做番哪吒都唔得啦！」所以佢話炒黃牛對表演者同觀眾都唔公道，亦因為咁佢從來都冇買過黃牛飛，仲話政府應加大管轄範圍，主辦單位亦都要調低內部認購嘅比例，相信咁就可以改善有關情況喇！
卓妮