政情：愛巢實行「問責制」馮興禮怕怕
勞工及福利局政治助理馮興禮（Henry）身為問責團隊一分子，照計一早預咗做得唔好就會被問責，不過早前同佢傾開偈，佢笑笑口話依家聽到「問責」兩個字就驚喎，究竟搞邊科？
原來Henry準備今年七月結婚，最近忙於搬入新居。未婚妻要求喺新屋實行「問責制」，即係邊個搞污糟地方或者食完嘢，就要自己負責清潔善後，難怪佢話聽到「問責」就怕怕喇！
忙到每日「烚菜」充飢
Henry又話，未婚妻定下唔少規矩，包括喺門口擺咗支香水，要求佢每日出門前都要噴一噴。雖然佢近幾個月公私兩忙，冇乜時間去健身，但係身材就唔見走樣，因為佢忙到每日只係「烚菜」充飢，想肥都難吖！