政情：譚文豪學打石屎槍驗樓唔驚畀人呃
眾所周知，立法會議員譚文豪（Jeremy）係民航機師，經常喺立法會內講航空議題，不過近日佢無端端去咗學打石屎槍。原來佢報讀咗職訓局嘅樓宇診斷及檢驗專業證書課程，學習樓宇結構同埋如何診斷、檢驗嘅專業知識。Jeremy笑稱，如果早啲上堂，就可以更加深入睇到早前爆大鑊嘅港珠澳大橋石屎問題喎。
打算考無人機或的士牌
Jeremy話，香港舊樓愈嚟愈多，相信將來會出現更多問題，學識有關知識之後，喺議會上問政可以更加專業，落區又可以幫街坊檢查樓宇問題，聲稱「唔使畀人呃吖嘛！」
佢又笑稱自己應該叫做「實測王」，因為鍾意咩都親身去試。佢除咗有機師執照外，仲有車牌同船牌，下個目標就係去澳洲考駕駛無人機嘅牌照，或者的士牌。咩牌都考晒，真係唔使擔心做咗羊牯畀人呃喇！