政情：社民連背景惹人厭浸大學生會斷莊
社民連前立法會議員梁國雄（長毛）因為宣誓風波而被政府就其議員資格提出司法覆核，最終被裁定喪失議員資格（DQ），令社民連失去喺立法會唯一議席；加上社民連外務副主席黃浩銘又因反新界東北發展衝擊案而被判入獄，社民連唔止喺議會冇碇企，仲面對「家道中落」、人才凋零問題。政團招募新血通常都係向後生仔埋手，不過似乎社民連就唔多受後生仔歡迎。最近香港浸會大學學生會舉行補選，有候選人因被質疑有社民連背景而被杯葛投票，最終因投票率過低而搞到「斷莊」添！
創辦人之一 陳士齊發電郵催票
香港各間大學學生會出現「斷莊缺莊」潮，最近就輪到浸大學生會。浸大學生會喺本周一至周四進行周年大會補選，但係就引起連番爭議，因為候選內閣「漣翊」嘅多名候選人被質疑有政黨背景，其中候選幹事長黃雅文係「社民連之友」成員，候選外務秘書趙崇佳就係社民連會員。
喺投票期展開後，社民連創辦人之一、現任宗教及哲學系高級講師陳士齊更向學生發電郵「催票」，呼籲學生幫助「漣翊」順利上莊。不過陳士齊其後又回應學生會編委會，話只係擔心學生會「斷莊」，到時就冇一個正式嘅學生會，無法與大學抗衡啫。
投票率低 未達一成以上門檻
唔少浸大學生都質疑內閣嘅政治立場。喺一個有關浸大嘅社交網站專頁就連日出現貼文，呼籲學生喺周年大會補選唔好投票，內容包括「投不信任票同棄權票，都只會幫左膠莊當選」、「記得拉多啲同學仔一齊唔投票，唔好比（畀）佢哋當選」。而前日浸大民主牆更出現「候選莊＝社民連」、「一票不投左膠莊」及「不讓政黨滲透學生會」等大字報。最終周年大會補選整體投票率只有約百分之九點七，達唔到有效得票超過基本會員人數一成以上嘅門檻，令選舉結果無效。
今次浸大周年補選風波反映社民連並唔受後生仔歡迎，相信佢哋想向年輕人埋手，吸納人才接班都唔容易。長毛正為DQ官司上訴，黃浩銘又仲坐緊監，睇嚟社民連主席吳文遠都要諗吓計吸納新血至得喇！