中環出更：同是新議員助理 工時大不同
立法會新任議員民建聯鄭泳舜（Vincent）及新同盟范國威（Gary），最近先後登招聘廣告搵助理，佢哋兩人身兼區議員，日後需兼顧地區及立法會工作，自然要請多啲助理喇！睇返兩份工嘅細節，工作性質同人工都差唔多，但以每周工時計，做Gary助理會返少超過五個鐘，似乎啱晒追求工作與生活平衡嘅人喇！
根據兩人喺勞工處所登嘅招聘廣告顯示，應徵者需有一年經驗，而且識兩文三語，熟識一般辦公室文書工作等。不過兩人開出嘅待遇就有出入喇，做Vincent助理嘅月薪係每月一萬至一萬三千元，視乎經驗而定。每周大約返四十九個鐘，而返工地點就冇得揀，只係得深水埗。
范國威助理返少6個鐘
至於做Gary助理嘅月薪比Vincent低，每月九千蚊至一萬三千蚊，望落以為呢份工唔抵做，其實係工時短啲。星期一至五係返朝十晚六，星期六就返十點至下午一點，每周工時四十三小時。咦？點解廣告寫咗一星期返四十四個鐘？唔通Gary太心急請人，計錯數？
卓妮