中環出更：莊莎娜珠寶界闖出名堂爸爸「跌破眼鏡」
近年獲得多項珠寶設計獎項嘅靚女設計師莊莎娜（Sarah）早前舉行自家品牌周年派對，Sarah嘅爸爸、雲南旅港同鄉會名譽會長莊哲猛、家姐莊菲娜（Fiona）同埋一班名人好友都有到場。莊哲猛笑笑口自爆最近經常跑眼鏡店，唔講仲以為佢視力有咩問題，原來係講吓笑，實情係佢估唔到細女闖出名堂，跌破眼鏡喎！
莊哲猛笑稱有朋友問佢，Sarah背後係咪有一支設計團隊，其實一個人都冇，個女由畫畫、倒模到製成都係自己動手做。見到個女咁敬業、認真，莊哲猛覺得好欣慰，笑稱自己好少讚佢，今次真係要讚吓佢。
莊菲娜想三個子女同校
Fiona生完第三胎之後好少出現公開場合，因為細仔啱啱四個月大，加上八、九月就要為大女申請小學，所以一直忙緊屋企嘢。Fiona話希望三名子女讀同一間小學，不過老公百仁基金副會長楊華勇主張畀大女以及大仔讀本地學校，細仔就讀國際學校，話要分散投資喎！Fiona笑稱兩種學校放假嘅時間都唔一樣，擔心到時佢會攰到飛起。
名媛何倍倩、「美容教母」鄭明明、莊哲猛太太駱英英及好友宓琪其等人都喺度。何倍倩最近又有新搞作，佢話依家咩都係Apps（應用程式）行先，所以年底將會推出一個App，利用區塊鏈同埋擴增實境（AR）科技，只需影住啲食材就知來自何處、成分、有冇安全證書等「出世紙」資訊，冀令關注食品安全嘅人放心啲咁話。
卓妮