政情：工聯會轉軚唔提派錢

請願促派糖

反觀一早就要求政府全民派錢嘅工聯會，自預算案公布就開始轉口風，到尋日佢哋去咗政府總部請願，要求陳茂波推出多項加碼派糖措施，包括寬免公屋租金兩個月、重推每戶二千元電費補貼，以及向唔使交稅或退稅不足三千元嘅低收入人士補足三千元津貼等，唯獨係冇再提全民派錢，睇嚟佢哋經已低調地正式轉咗軚。

工聯會唔再要求派錢，除咗因為政府已斬釘截鐵講到明唔派，估計亦同立法會補選結束有關，身為建制派一員係時候要歸位。反而兩名新當選嘅民主派議員區諾軒同范國威，前日就帶頭要求政府全民派錢，為稍後對預算案投反對票鋪路。