中環出更：黃繼兒話手機最易揭婚外情
今時今日，手機已變成生活必需品，唔少人冇咗部機都出唔到街，但手機入邊有好多個人資料，都好危險。個人資料私隱專員黃繼兒（Stephen）早前出席一個活動時就講起，手機最易揭露婚外情，工商管理研究社（研究社）顧問鍾志平就話，要完全刪除手機嘅資料，一定要整碎相關嘅零件先得吖！
Stephen話，手機內嘅資料唔容易刪除，所以佢換手機時一定唔會賣舊機，以保障個人資料安全。好多人會用雲端做備份，佢話係咪安全就視乎邊間公司，講講吓，Stephen就諗起《未來戰士》，話依家人工智能咁發達，將資料畀晒電腦，會唔會有朝一日電腦用番呢啲資料嚟對付人類呢？聽落真係幾得人驚喎！
盧永文唔畀員工帶走客戶資料
今次活動係研究社春節聯歡，唔少政商界人士出席，包括教育局副局長蔡若蓮、建築師學會前會長鄺心怡、香港潮州商會青年委員會主任章曼琪、研究社主席盧永文及顧問陳志德等人，仲有仁愛堂副主席陳達華夫婦。講開私隱話題，盧永文話保障客戶嘅私隱好重要，所以佢唔會容許員工亂咁帶客戶嘅資料離開公司。
現時社會風氣唔同晒，依家好多人鍾意擺自己嘢上網，連履歷都照放不誤。蔡若蓮就話，僱主對住呢啲咁公開嘅履歷資料，都要查多次先知係咪屬實。講開搵工，佢話有研究發現，有啲人喺三十二歲前就做過九份工，佢自己就冇咁多嘞，至今只係做過四份工，其中兩份係同一個僱主添！
卓妮