政情：王庭聰狗年願望 樓價咪再升 社會和諧啲
本港樓市近年愈升愈有，而喺農曆新年前，港股曾經起起跌跌，外界都關注到底樓市又會唔會有調整嘅空間，等班年輕人有機會「上車」。早前喺一個場合見到香港中華總商會選任會董王庭聰，講起依家嘅樓價，連出咗名幫仔女置業嘅佢都話覺得太高，所以佢都唔會再入市啦，話夠住得o架啦！樓市千祈唔好再升，再升都唔知啲人點買。
冀多啲年輕人上到車
對於後市，王庭聰相信高價樓嘅價錢會好穩定，至於細價樓會唔會回落啲就好難講，因為要視乎息口，估計息口仲會加啲，即使細價樓樓價未能回落，相信都會冷靜番啲。佢又話狗年除咗希望大家都健康平安，亦好希望樓價唔好再升，令多啲年輕人可以上車，希望今年政府開發多啲土地同多建公屋，立法會又合作啲，為香港嘅市民做啲嘢，社會氣氛和諧啲喎。