政情：美國校園槍擊增 李何芷韻：讀大學唔怕
美國最近接連發生校園槍擊事件，相信唔少家長睇見都驚驚。早幾日喺保良局嘅活動上，見到總理李何芷韻（Amanda）、譚毓楨（Jenny）同副主席何超鳳三個人特別好傾，原來佢哋係美國南加州大學嘅校友。Jenny話當年讀書時冇咁多校園槍擊案，但最近多咗，真係有朋友因為咁唔敢畀仔女去美國讀書，寧願去英國。Amanda就話讀大學唔怕，但係若果去讀中學就唔好喇！
Amanda同老公、仁濟醫院前主席李文斌育有三名子女，大嘅龍鳳胎八歲，細仔五歲。佢話當年讀緊大學嗰陣都不時有啲校園槍擊案，但佢間學校同埋社區出名係安全啲嘅，所以冇咁驚。佢話唔會太早送仔女出去讀書，可以留喺身邊耐啲梗係好啲喇！
唔會太早送仔女出去讀書
講講吓，Jenny同Amanda又講起香港最近好多交通意外，當中仲有相熟嘅朋友遇車禍身亡添！難怪Amanda話，比起擔心仔女去美國讀書唔安全，佢更加擔心將來個仔鍾意飛車添！