政情：朱凱廸議辦見周公 財經委員會險流會

財經事務委員會尋日朝早十時召開會議，喺九時五十分左右，立法會秘書處職員已經開始密密Call議員落嚟會議室，據知曾經打過畀公民黨（公文袋）郭榮鏗同楊岳橋（Alvin）、朱凱廸、獨立建制派何君堯、保險界陳健波、進出口界黃定光同新民黨葉劉淑儀等，喺會議室內嘅議員亦一齊打電話搵人救亡。

十點開會欠一人 楊岳橋趕至

陳健波率先由辦事處跑落嚟，但仍欠一人先夠法定人數，及後秘書處聯絡到何君堯答應開會，但至十時零九分仍未見人，秘書處只好再打畀Alvin，得知佢已抵港鐵站，而Alvin隨即拔足狂奔返立法會。突然間，金融界陳振英就跑出會議室外，話資訊科技界莫乃光講朱凱廸喺議員辦事處瞓緊覺，叫秘書處上去拍門捉人喎。

其實當下眾人已將希望投放喺Alvin身上，有人更笑稱「叫佢唔好打呔，上咗嚟先」，最後Alvin不負眾望衝入會議室成功救亡。何君堯更喺會議開始後近一小時先現身，而朱凱廸回應時就承認前晚已經喺辦公室過夜，電話校咗靜音先聽唔到秘書處來電，最後約十時十五分抵達會議室開會。其實，朱凱廸喺上任初期接到辦公室嘅時候，曾經話過要諗計設計過辦事處裝修，唔知係咪一早已密謀成日喺度留過夜呢？

據了解，一早預告會缺席嘅議員就包括金融服務界張華峰、地產及建造界石禮謙、商界林健鋒、民主黨胡志偉、工程界盧偉國同民建聯周浩鼎，最後周浩鼎都有出席會議。之但係咁都險釀流會，睇嚟班議員唔好咁大安旨意遲到喇！