中環出更：一地兩檢開快車 個半月開13次會
廣深港高鐵一地兩檢嘅安排爭議不休，為確保相關嘅草案如期喺今年七月立法會暑假休會前三讀通過，趕及高鐵喺第三季通車，立法會《廣深港高鐵（一地兩檢）條例草案》委員會準備「開快車」審議，將於下周二至下月三十日期間，召開十三次會議，合共二十六小時，並喺下周六召開兩節公聽會。
望暑假休會前完成審議
委員會主席葉劉淑儀尋日話由於委員人數眾多，故加開會議讓議員有更多時間發問，但強調暫未有畫「死線」限定喺乜嘢時候結束討論，但係呢條條例有一定時間性，目標係希望可於暑假休會前完成審議工作。至於律政司司長鄭若驊、保安局局長李家超同運輸及房屋局局長陳帆係咪繼續出席會議，佢話三名司局長已答應出席本月嘅會議，而公聽會當日暫時已知陳帆會出席。
對於泛民指會議期間被限制發言時間，葉劉話每個會議都有其秩序，唔同嘅委員會主席亦會限制發言時間，強調冇訂下死線限制議員咩時間唔准再發言，佢只會按《議事規則》處理。
一地兩檢關注組召集人兼委員會委員陳淑莊就話，公聽會當日會有一百個團體出席，認為三名司局長必須出席，如任何一人會缺席應擇日再開。佢又形容葉劉只記得政府時間表，忘記議員責任，期望葉劉可保持中立、公道，唔好只盲目跟隨政府的時間表，讓議會有充足時間審理。
卓妮