中環出更：科技進步黃紹基盼買玉唔靠估
香港珠石玉器金銀首飾業商會（商會）早前舉辦聯歡晚宴，商會理事長黃紹基見到香港玉器商會主席鄧錦雄就連聲祝佢開玉時「件件滿綠」，夠晒特別。黃紹基笑笑口話，以前做玉器生意嘅人會買舊玉石返嚟自己開，好似六合彩開獎咁，如果開咗之後見到成塊綠色就發達喇，但亦可能係舊石頭嚟。
鄧錦雄係家族玉器生意第五代傳人，唔知佢開玉係驚喜多，定係驚嚇多？佢笑稱依家已經唔係咁，而係切開嚟買，最緊要睇得清楚。
羅志光談玉石 「要按材施藝」
玉器商會會長羅志光啱啱開咗一塊用五百幾萬元買返嚟嘅玉石，做咗幾件花件、手鈪之後已經回本，剩低嗰啲賣一件賺一件，笑稱唔錯。本身係玉器雕刻大師嘅佢話，如果識得雕就可以將玉石嘅價值發揮到最大，塊石似乜就做乜，最緊要按材施藝。
黃紹基話今時今日想吸引年輕人買首飾好難，因為年輕人覺得呢行好落後，有閒錢寧願買新款手機或者去旅行。佢希望用科技令行業與時並進，好似玉器靚唔靚、地通唔通透，以前係靠經驗傳承，未來可以多啲應用科技，買玉就唔使估估吓。
同場仲有商會監事長周傑成、珠寶創意中心大師工作室行政總監何冠寰、香港寶石學協會認證及標籤計劃理事邵為忠、秘書長廖尚宜等人。
港產測翡翠標準 內地重視
邵為忠話佢哋發展咗一套翡翠測試標準，喺香港培養咗近一百個認可鑑證師，內地最大嘅珠寶學院好重視，將來可能會接納呢個港產標準添！
卓妮