中環出更：阿仔同周嘉儀甩拖 林健鋒重現笑容
行政會議成員兼立法會議員林健鋒（Jeffrey）嘅仔林凱章，兩年前被拍得喺台北同靚女前主播周嘉儀把臂同遊，但事後Jeffrey曾經黑面拒評呢段感情，最近周嘉儀自爆甩拖，今次Jeffrey雖仍拒評，但就笑住話阿仔依家好開心，一家三口仲趁農歷新年去日本玩添！
Jeffrey話阿仔目前好開心，但就唔評論阿仔嘅感情生活，言談間不時露出笑容，同早年被問到阿仔同周嘉儀戀情時嘅黑起口面截然不同。
咁啱周嘉儀尋日亦為某電視節目錄影，提到同林凱章分手一事，佢話冇因為感情問題影響心情，反而因為新年食得多嘢而令體重有增加，又話分手都已一段時間，所以冇乜嘢影響。至於分手後有冇追求者，佢就話唔覺得有追求者喎。
全家遊東京 讚鐵路方便
講番Jeffrey早幾日一家三口去東京旅行，佢大讚當地鐵路系統方便，舉例指佢哋由酒店去餐廳，搭地鐵只需廿分鐘，但搭的士因塞車而要四十分鐘，而且前者較後者便宜逾廿倍。佢話東京地鐵雖然擠迫，但指示清晰，唔擔心會轉錯車，佢唯一嘅批評係日本人喺車廂中，不論任何年紀都只係玩手機。咁佢返港後會唔會轉搭港鐵呢？佢就話港鐵覆蓋網絡仍然唔夠完善喎。
卓妮