政情：梁福元鍾意菠蘿 種到成屋「金叵羅」
十八鄉鄉事委員會主席梁福元一向鍾情花花草草，又大搞有機農業，連屋企入面都種植唔少蔬果，當中最搶眼就係一盆盆嘅金菠蘿。不過，除咗食得嘅菠蘿，佢屋企都唔少金叵羅，其中今年又多一個喇！
梁明堅想生到第三胎收工
梁福元嘅兒子、元朗區議員梁明堅（Jason）本身已有兩位千金，而佢今年五月將再添一女，難怪梁福元都話屋企多金叵羅喇。雖然梁福元為原居民，但就明言生男孫或女孫都一樣咁開心，又大讚兩個孫女每星期都陪佢飲茶添。Jason就話打算建議太太生埋第三胎就收工，因怕教育同親子時間唔夠，但係透露太太仲有意再追喎。
講番梁福元種植嘅菠蘿，佢就話去沖繩參觀菠蘿園後決定引入，現時已種植過萬棵，仲有打算用嚟製作鳳梨酥添。另外，佢連香印同巨峰提子都種埋，預計年底就有收成，不過唔係所有生果都難佢唔到，好似椰子同榴槤就因氣候問題種唔出喇。