政情：考察大灣區 內地遞上回鄉證 泛民驚青扭扭擰

林健鋒尋日話，立法會經濟發展事務委員會、工商事務委員會、財經事務委員會、資訊科技及廣播事務委員會將於四月二十日至二十二日到內地大灣區考察三日，預計到訪五個城市，包括東莞、廣州、中山、深圳及佛山，會去參觀當地嘅基建、企業，而相關城市市長同各市領導都會向一眾議員講解大灣區嘅發展；下月一日就會開會討論考察嘅細節。

對口政策局官員獲邀同行

除咗議員之外，林健鋒仲話會邀請埋四個委員會對口嘅相關政策局官員同行，即商務及經濟發展局局長邱騰華、創新及科技局局長楊偉雄、財經事務及庫務局局長劉怡翔、政制及內地事務局局長聶德權。現時四個委員會主席除了林健鋒屬建制派外，其餘三個委員會主席都係民主派，包括工商事務委員會主席胡志偉、財經事務委員會主席梁繼昌、資訊科技及廣播事務委員會主席莫乃光，三人都表明會隨團。

梁耀忠唔去 鄭松泰怕危險

林健鋒就提到，民主派同建制派都有議員表達有興趣去考察大灣區，但有一兩個議員係冇回鄉證，希望佢哋想去嘅話盡快同相關機構申請喇。據了解，民主黨涂謹申同街工梁耀忠都無回鄉證，但梁耀忠同人民力量陳志全就傾向唔去；熱血公民鄭松泰及本土派議員朱凱廸更講明唔會去，鄭松泰仲話擔心返咗內地有危險。至於涂謹申就話自己未有回鄉證，亦都未決定去唔去，要同黨友傾完先至決定喎。而公民黨亦未決定去唔去。

每逢返內地考察，對民主派嚟講可以話都係一個考驗，好驚隻腳一踏入內地，就被外界標籤，而且過往經常批評內地拒發回鄉證，依家內地釋出善意，回鄉證有效期仲可能係十年期添，但民主派就「葉公好龍」，個心十五十六、扭扭擰擰、表現得驚驚青青。其實內地發展可以話一日千里，如果班民主派只係識開口埋口批評內地，故步自封，真係注定做井底之蛙。