中環出更：拉布累事 吳永嘉議案「冰封」七個月
早前民主派就立法會討論「一地兩檢」無約束力議案及修改《議事規則》瘋狂「拉布」，搞到工業界議員吳永嘉（Jimmy）提出嘅「再工業化」議案拖足七個月都未開始討論，期間更修改咗講稿十幾次。由於議案長期印喺議程上，有唔熟悉嘅市民就問佢點解可以經常提出議案，佢苦笑話「咁算唔算間接推高我知名度？」咁咪因禍得福？
講稿改十幾次 仲未討論
Jimmy提出嘅「構建全方位『再工業化』政策體系」議案，早於去年七月就排喺議程，但係其後建制民主兩派爆發 「一地兩檢」無約束力議案同修改《議事規則》嘅攻防戰，喺民主派瘋狂拉布下，討論次序排最尾嘅議案不斷延期，直至農曆新年放假前嘅大會都仍然未開始討論，換言之，拖咗足足七個月仍然原地踏步。
Jimmy就大吐苦水，話工業界營商環境瞬息萬變，而為咗確保議案發言內容唔過時，過去七個月就修改咗份講稿十幾次，但係每次改完都係得個「吉」，難怪佢其中一個新年願望，就係議案可以喺今個會期之內完成討論。
卓妮