中環出更：福建幫氣勢如虹 陳亨利連添三孫
福建社團聯會（聯會）尋日舉行新春團拜，新正頭加上福建幫過去一年喺政界發展氣勢唔錯，現場恭喜聲此起彼落，歡樂氣氛濃厚。講到喜事，相信冇人夠保良局前主席陳亨利（Henry）厲害，事關過去四個月連添三個孫，其中一個孫女喺過年前夕搶閘出世逗利是，難怪佢過年邊度都唔去，留港享受湊孫樂喇！
Henry講起抱孫就笑不停，佢有四名子女，依家開枝散葉，總共有八名孫仔孫女，真係抱孫抱到手軟。佢笑笑口話，過年期間子女全部返晒嚟，屋企好熱鬧。中國人話「多子多孫多福氣」，見Henry咁開心，就知冇講錯。
盧溫勝台北浸溫泉度歲
有人留港享受家庭樂，亦有人趁假期出埠度歲。聯會第一副主席盧溫勝就去台北浸溫泉，臨返港前遇上輕微地震，有驚無險。佢笑言好鍾意台灣，因為當地人十分友善，有次佢搭的士時突然感慨萬千，心諗不如移民台灣，因為喺香港搭的士成日要受氣喎。
同場仲有聯會主席吳良好及兒子吳志龍、榮譽顧問楊孫西、副主席兼秘書長周安達源等人。
中華廠商聯合會副會長吳清煥都喺度，佢過年時同家人去印度玩，不過當地酒店嘅飲食仍未夠國際化，焗住餐餐食咖喱，食到怕。
返港冇幾日，下月初佢同太太又搭郵輪歎世界，今次係獲船公司免費招待去泰國、越南及台灣豪遊十五日，但今次旅程實在太悠長，所以決定訂機票提早五日返港喎。
卓妮