新年流流，好多人都會祝福至親好友「出入平安」，講多無謂，行動最實際，最貼心莫過於買番個頭盔又或者避彈衣送畀身邊人。你知喇，今時今日香港治安不靖，周街殺戮戰場，都係「全副武裝」出行穩陣啲！
尋日凌晨兩點幾，多名懷疑黑幫刀手喺灣仔鬧市衝出馬路，攔截一輛七人車同一輛客貨車，扑爆車窗及擋風玻璃後狂斬車內男子，對方負傷突圍截的士離開，醒目的哥見唔對路，直接車去醫院求診，目前傷者情況危殆，斬人現場同的士車廂留下大攤血漬，令人毛骨悚然。差唔多同一時間，一名酷刑聲請獲發「行街紙」嘅四十多歲印度漢，亦喺中區被兩名同鄉從暗處撲出老笠，被擸走萬幾銀現金。
兩單畸士，一單涉黑，一單涉南亞兵團，將本港兩大治安毒瘤嘅禍害表露無遺，呢班瘟神全年無休，市民過個年都不得安寧，你話點頂？雖然話係爛鬼打爛鬼，但係沙塵滾滾，玩吓手容乜易誤傷良民o架。
一個毒瘤已經惡頂，仲要交叉感染，「兩毒合流」，香港唔死都一身潺。係人都知，以南亞兵團為代表嘅假難民大軍，只要舉手聲請酷刑免遣返，一張「行街紙」在手，鍾意喺度賴死到幾時都得，呢班瘟神打黑工、姦淫擄掠，無惡不作，係香港人都買佢哋怕。不過本地黑幫就睇中佢哋窮兇極惡，膽正命平，而且千人一面，個個差唔多樣，就算捉到都冇咁易斷正。佢哋大量招募南亞兵團充當打手，食大茶飯，香港地時不時都會有涉及假難民嘅大型械劫案，就係咁解。
南亞兵團大受本地黑幫歡迎，除咗好使好用，更加因為供應源源不絕。大家有眼見，港府既唔肯退出國際難民公約，又唔肯設立禁閉式難民營，加上一群偽善政客手指拗出唔拗入，助紂為虐，結果香港咪變成罪惡淵藪、人間地獄咯。
最離譜嘅係，警方長期執法不力，近年甚至頻頻爆出「內鬼」向人蛇集團及黑幫通風報信嘅醜聞，黑惡勢力火乘風勢，風助火威，自然有咁旺燒咁旺，分屬不同「字頭」嘅南亞黑幫分子光天化日下喺鬧市開大片；黑幫收南亞o靚，公然喺天橋底燒黃紙斬雞頭舉行入會儀式，如果唔係恃住當局放軟手腳甚至有保護傘，又點會咁肆無忌憚吖！
咁就難怪愈來愈多香港人爭住跳船，連台灣都成為移民熱門目的地。政治紛紛擾擾，社會爭拗多多，市民已經夠煩厭，加埋治安不斷惡化，安全城市淪為罪惡之都，想唔好似黃大仙靈籤講得咁樣「陶潛醉酒」，走得就走都唔得喇！