政情：新上任婦委會主席 陳婉嫻年三十都要開會
立法會前議員陳婉嫻剛喺上個月獲任命為婦女事務委員會主席，佢透露首次會議啱啱召開，而當日就撞正年三十晚。連團年飯都要讓路開會，睇嚟嫻姐真係有鴻圖大計，決心為婦女下工夫喎。
嫻姐話喺首次會議上已經表明其心願，就係希望兩年嘅任期內，可以處理到婦女難就業、在職貧窮同託兒問題。佢更明言希望任內可以做到嘢，為解決問題提供持續嘅方向，但佢都大嘆兩年時間好快過，所以一定要計劃好時間表咁話。
大讚成員有朝氣
佢又大讚婦委會成員朝氣勃勃，更有委員主動提出自行帶隊，落去十八區聽意見，以克服秘書人手不足嘅問題，班委員咁主動積極，難怪嫻姐都話聽見都開心喇！現時嘅婦委會咁有活力，唔知同前香港女飛魚蔡曉慧嘅新加入有冇關係呢？