政情：細路多功課 劉燊濤笑稱「又係我做」
近日流感相當嚴重，令到小學同幼稚園都要提早放農曆新年假，但都畀咗好多功課，香港工業總會青年委員會名譽會長劉燊濤（Gary）都話好擔心小朋友會感染流感，農曆新年假唔會帶小朋友出國，香港流感咁嚴重，即使出國外都有危險，盡量只會點對點咁送小朋友往返自己屋企同他人屋企，唔會畀小朋友去多人嘅地方。
畀佢睇電視解悶
咁小朋友有冇投訴成日喺屋企好悶呢？Gary就話小朋友投訴就會出動電視機，因為畀小朋友出街，自己又驚，但又明白成日喺屋企一定會悶，反正放假就畀佢睇吓電視啦！
唔少學校趁提早放假，都畀好多功課小朋友，咁Gary嘅小朋友會唔會有好多功課呢？佢即刻笑指「好多功課咪又係我做」，因為小朋友依家都係讀緊N班，啲功課都係種吓盆栽，紀錄每日高咗幾多，或者有個公仔畀小朋友黏自己個樣上去，再襯唔同嘅衫，「三歲人仔點會識吖，咪又係太太同我做」。睇佢一路講，一路笑得咁開心，相信佢同小朋友一齊做功課都做得幾開心嘅！