政情：陳恒鑌用炮仗美食氹囡囡回鄉
農曆新年期間，唔少市民都蜂擁回鄉探親，但係年輕一代似乎唔多想長途跋涉，寧願留守香港。立法會議員陳恒鑌（Ben）為咗培養囡囡返鄉下嘅習慣，就用煙花炮仗同家鄉美食做餌，成功氹得囡囡一齊回鄉度歲，兩父女仲一齊玩煙花，玩得非常開心。
曾經帶囡囡去戒除公主病嘅Ben，近日再有新「療程」，就係要培養阿女回鄉過年嘅習慣。潮州人家庭觀念重，農曆新年呢啲大時大節，大部分人都會回鄉探望親戚，Ben亦唔例外，幾乎每年都喺潮州過年。Ben嘅囡囡依家得幾歲，自然會跟佢回鄉，但諗到時下年輕人對回鄉過節愈嚟愈冷淡，Ben就諗出一招「利誘」，用煙花炮仗同家鄉美食吸引囡囡回鄉。
父女開心玩煙花
Ben話計劃成功，囡囡今年已主動要求回鄉，而今年佢哋兩父女亦趁機玩煙花，囡囡雖然一開始有啲驚，要Ben代為揸住，但之後見到煙花咁靚，自己亦玩埋一份。