政情：問責官運程 黃偉綸易出錯陳帆或爆醜聞

楊師傅指陳帆係水命，但喺木嘅月份出世，亦係強土嘅年份，弱水命要行金運或水運，今年全年都係火土年，如果要做出成績，要農曆七月後，先有機會，希望佢上半年身體好啲，農曆四、五、六月最易出事，一般嚟講係腸胃毛病，農曆五月有錢銀或女人方面嘅枝節，希望佢冇乜大事錯，否則農曆五、六月會出醜聞。

至於黃偉綸，楊師傅指佢係弱火命，特別孝順勤力，事業上，農曆七月後較弱，如果有投資或大搞作，農曆七、八月唔好咁搏命，因為私人生活影響工作，佢一八年行雙官運，有啲蝕底，今年吃力不討好，多做多錯。

羅智光要注意健康

其他問責官員方面，公務員事務局局長羅智光係木命，強木，但喺火嘅月份出世，強中火太旺，變成虛耗過度，今年要特別注意身體，尤其是農曆四、五月，一八年係財生官旺，做嘢比較順暢，但身體或有毛病，如果知道自己有咩事，早啲檢查較好。

楊師傅又批算勞工及福利局局長羅致光係丙火命，狗年係戊戌年，今年會愈做愈興旺，係最有作為，春夏較平平無奇，農曆四月後開始發光發熱，到五、六月就開始爬上高峰，七、八月會停一停，農曆九月至整個秋冬，都會做出好嘢。

另一名喺一八年會有作為嘅官員係財政司司長陳茂波，佢嘅八字係勤力人，因為佢官煞旺，特別進取，就算唔係本行出身，都會好勤力做出成績。佢係弱土命，行到旺土八字，一八年會有作為，農曆三、六、九、十二月會有佳作，春天要注意啲身體。

近日捲入僭建風波嘅律政司司長鄭若驊就係水命，忌金水，強命唔怕火土，狗年係戊戌年，佢行七煞運，屬於強硬，遇強更強，點樣都有招擋你，所以上半年屹立不倒，農曆九月更好，農曆七、八月會出現大亂陣腳嘅事，如果充耳不聞就冇事，一過九月就會有成績，對香港有利，對佢自己不利。