中環出更：兩子公院打仗 高永文唔肉赤
踏入流感高峰期加上農曆新年長假期，公立醫院持續爆棚，唔少前線醫護人員叫苦連天！食物及衞生局前局長高永文一家四口，四人都係醫生，佢尋日出席活動時大爆，兩個仔正喺最繁忙嘅公立醫院打緊仗，但佢唔會肉赤佢哋喎，仲話做醫生就係唔錫身！
高永文話呢個農曆新年無外遊，留喺香港做嘢。咁兩個仔係咪好忙呢？佢就大嘆兩個仔做嘢好忙，大家好少見面，而且兩個仔就係喺好逼嗰啲地方做嘢。佢又笑稱兩個仔大個喇，自己識做好防護措施，不過佢都好支持兩個仔，因為做醫生同醫護人員就係唔怕辛苦去服務市民，所以唔會覺得肉赤。
輪椅伯伯教練氣功
喺活動上，高永文巧遇一位坐輪椅嘅伯伯，伯伯話高永文曾經頒過獎畀佢，知道依家流感好勁，專登過嚟教高永文練氣功，仲叫佢幾忙都要學同練習，要保持健康做更多嘢。
卓妮