中環出更：調亂車公籤莫錦貴失眠
話說新界鄉議局日前按傳統，喺大年初二去車公廟為香港求籤，雖然事後爆出烏龍調亂籤疑雲，但沙田鄉事委員會主席莫錦貴（貴哥）當日就話「菩薩安排」。而佢尋日出席新春團拜時就認為當日只係混亂，又自爆當晚曾經失眠，直言會檢討求籤安排。
沙田鄉委會尋日舉行新春團拜，除咗副主席李志麒同張子賢等鄉紳外，沙田民政事務專員陳婉雯同立法會議員葛珮帆都有出席，當然唔少得一班沙田區議員，例如黃冰芬、董健莉同潘國山等。
陳婉雯視籤文溫馨提示
被問及調亂籤嘅事，貴哥重申係神明嘅安排，仲話好接受呢個安排，更話調亂籤係一個謎添！佢又透露，將開會傾點改善求籤安排，包括打算搵著名堪輿學家蔡伯勵提供意見，因為對方夠權威唔會受質疑。至於當日負責求籤嘅李志麒都話，當晚亦因烏龍疑雲而失眠，但就未諗出年會唔會繼續求籤嘅問題，但貴哥就對佢投下信任嘅一票。
陳婉雯就話媽媽以前年年都會幫屋企人求籤，而佢就視籤文為溫馨提示，至於今次調亂籤疑雲，佢就希望大家有所包容，因為負責嘅人員並非人工智能，唔能夠做到盡善盡美，但相信沙田鄉委會會吸收經驗，出年嘅安排會更加完美同有效率喎。
黃冰芬隨緣 唔睇掌問卜
另外，黃冰芬喺大年初二都有去參拜車公廟，但佢話即使求籤時在場都未能確定有冇調亂車公靈籤，因為受身高所限而視線受阻囉！佢就話年幼時，屋企人會為佢求籤，但人愈大就反而無咗習慣，亦都唔會睇掌問卜，因為怕結果唔好而搞到自己唔開心，情願一切隨緣咁話。
卓妮