政情：涉公器私用 李軒朗被學聯停職
學聯秘書長、地區組織「九龍角落」主席李軒朗，日前喺學聯會址中存放「九龍角落」物資，包括易拉架、單張同印章等，被學聯及學生活動基金有限公司董事陳珏軒喺前晚發現，其後喺Facebook貼文質疑「九龍角落」有冇向學聯常委會申請，強調學聯作為學界平台，絕不應助長任何公器私用行為，令學聯淪為任何政治團體或組織之私人空間。
陳珏軒斥李講大話
李軒朗事後喺Fb貼上道歉聲明，指事件係源於當日「九龍角落」活動結束後返回學聯會址稍作休息後，一時疏忽忘記帶走，唔係有意佔用學聯會址，但陳珏軒認為李軒朗係狡辯，指有關物資喺雜物房搵到，係唔多方便嘅位置，而喺學聯會址搵到嘅物資數量亦較李當日街站嘅物資數量多，直斥李「不但沒有道德，就連大話的智慧也欠奉」。
學聯尋日發聲明回應，指並無接收過任何以組織「九龍角落」身份提交嘅場地借用申請，僅有李曾喺上月六日提出借用場地舉辦私人事務會議，但已遭否決。聲明續指即時暫停李嘅職務並就此事製作獨立報告。另外，「九龍角落」就話對學聯嘅形象可能受到影響深表歉意，同時李軒朗已申請辭去主席一職。