政情：守護基金籌款加碼掠水 搵市民找數
「佔中三子」戴耀廷、陳健民同朱耀明喺一四年發起違法佔領行動，而陳、朱二人喺一六年底成立咗「守護公義基金」，為社民連梁國雄（長毛）、香港眾志羅冠聰、劉小麗同姚松炎被取消立法會議員資格（DQ）籌訴訟費。而喺基金成立初期，第一階段嘅籌款目標係五百萬元，事隔一年之後，基金亦已經籌得逾一千一百萬元，但基金發言人鄭宇碩尋日話，仲再需要為基金籌多五百萬元，除咗幫DQ四子之外，仲要幫包括「佔中三子」在內等九名被檢控嘅搞手籌訴訟費。換言之，即係基金加倍掠水，要市民為佢哋埋單找數啫！認真無恥。
守護公義基金自一六年底成立後，騎劫多個遊行去籌款，而大多數泛民政黨都會將各自籌得嘅款額撥埋畀基金。鄭宇碩尋日話基金已籌得逾一千一百萬元，而DQ案首輪官司訴訟費用、違法佔領行動九名主要搞手嘅案件初步訴訟費用，加埋已使咗成五百幾萬元，依家基金得番大約五百八十萬元左右。
又想籌多五百萬 如無底深潭
鄭宇碩話基金剩番成差唔多六百萬係要用嚟畀劉小麗同長毛嘅上訴、因DQ案輸咗後要用嚟畀政府律師團堂費同埋DQ四子被追討薪津案嘅官司費等。
佢仲話由於違法佔領行動嘅審訊就嚟開始，估計所需要嘅費用都會好龐大，而由於基金有好大嘅財政壓力，所以佢話要再繼續籌錢，預計要多五百萬元。埋單計吓數嘅話，即係DQ案、佔中九子案加埋都要差唔多成千六萬元，幾乎全部由市民找數。
基金本來係支援DQ四子，依家就改晒口話要幫埋佔中九子案籌款。喺一四年發生嘅違法佔領行動為期七十九日，啲市民怨聲載道，佢哋「去飲」，飲完之後一直拖住唔肯找數，基金要市民幫佢哋埋單找數，已令外界極度反感，呢次仲要加倍掠水，仲唔知日後會唔會又再加碼籌款，咁搞法根本就係無底深潭。
另外，姚松炎已報名參加立法會九龍西補選，其餘兩名候選人包括民建聯深水埗區區議員鄭泳舜同獨立嘅蔡東洲。