政情：羅致光：政府廚房熱力源自立會
勞工及福利局局長羅致光尋日出席青協舉辦嘅「有情廚房」活動，親自下廚同幾位年輕人合製甜品，之後會派畀啲獨居長者享用。談及政府嘅問責官員團隊又名「熱廚房」，佢就話自己喺政府總部個辦公室冷氣好勁，一啲都唔覺熱，官員感受到嘅熱力其實係源自立法會，有時仲會熱到擦出火花，燒到埋身！其實羅致光都做過立法會議員，不過當年會議廳嘅熱度，同依家真係相差好遠。
留英時學識煮雞
講番真正嘅廚藝，羅致光自言最撚手係整雞，豉油雞、葡國雞、咖喱雞，幾乎乜雞佢都識煮，係佢當年留學英國時學會。至於甜品佢當年就好少整，因為嗰時啲海外華人對香港留學生十分照顧，每逢佳節都會送啲糕點畀佢哋食，唔使自己煮。佢慨嘆係返到嚟香港，啲鄰舍關係反而唔似喺外國時咁密切，過年大家見到面，最多都係講句恭喜說話，唔會互送食品賀年。