中環出更：離開官場多搞作 高永文做埋港大校董
食物及衞生局前局長、骨科醫生高永文離開「熱廚房」之後瓣數多多，重投醫生老本行搵真銀後，喺內地獲委任要職，而港府尋日又委任佢做香港大學校董，即係醫學界、政界同學術界都有涉獵，唔知加埋晒係咪仲忙過做局長呢？不過，現時大專院校變得政治化，兼且港獨蔓延，做校董都可能隨時中箭。
任期下月開始
其實高永文係港大校友，早年就讀港大醫學院，畢業後成為骨科醫生，之後喺公立醫院工作。不過，二○○三年沙士襲港，當時高永文署任醫管局行政總裁，同年辭職，開始喺私人市場執業，後來就做咗局長。高永文講過唔支持港獨，又對於大專院校民主牆出現港獨言論感覺到唔開心，唔知佢做咗港大校董會否教吓啲師兄妹呢？
除咗高永文外，港府亦委任另外五人出任港大校董，包括拔萃男書院校長鄭基恩、前立法會主席曾鈺成、盧彩雲、關治平同余浩霖，佢哋嘅任期由下月一日開始，為期三年。負責港大校務嘅係港大校務委員會，至於港大校董會就只屬諮詢機構。
卓妮