中環出更：音樂會迎新春 議員落場同合奏
立法會不時舉行午間音樂會，特別鍾意選擇佳節前夕舉行，為立法會增添節日氣氛。午間音樂會尋日再次上演，提早與議員、職員迎春節，今次由二○一六年香港青年音樂匯演優勝隊伍到場獻技，演出富有農曆新年氣氛嘅樂曲。不過，講到最特別，就係今次獲議員加入演奏，真係夠晒噱頭喇！
今次到立法會演出嘅係高雷中學中樂團，獲經常大騷音樂才華嘅工程界議員盧偉國、教育界議員葉建源，同埋立法會助理秘書長盧思源一齊合作演出。其中盧偉國同盧思源就參與兩首樂曲表演，仲演出多過一種樂器添。
葉建源為處男演出苦練打鼓
議員葉建源就話，今次係佢處男演出，因為身為該校校董，所以決心要苦練同學生一齊演出喎。佢尋日就負責為一首樂曲打鼓，講笑話經過一個星期嘅練習後，已經成為「幼稚園級」樂手，仲話已經學識睇指揮添。而上星期就跟隨一位中二女學生學習打鼓，獲大讚學嘢快，佢仲話呢個星期不斷練習，用筷子當鼓棍、書本當鼓，難怪表演時姿勢分十足。
至於盧偉國就放低新寶貝鑽石色士風，改為出動琵琶同洞簫。佢話琵琶係大學一年級時購入，至今已超過四十年歷史，當年趁升讀大學買嚟獎勵自己，所以好有紀念價值！
盧偉國借學生二胡即場獻技
另外，尋日正式演出時只係第二次同呢班學生合作，但演出過程順利，盧偉國仲喺表演後，借用學生嘅二胡即場獻技，睇嚟冇樂器可以難倒佢喎。
另外，立法會秘書長陳維安同唔少議員都有到場觀賞，議員廖長江就直言中西樂都鍾意聽。議員姚思榮就話，讀書時代唔少同學玩中樂，受佢哋影響都特別鍾意聽中樂，因為覺得中樂聽得好舒服。
卓妮