政情：黃梓謙轉行 從政經驗幫到手
領展最近以二百三十億港元售出旗下十七個位於九龍、新界嘅商場畀私募房地產基金管理公司基滙資本。商場易手後不時傳出趕走小店嘅負面消息，為咗建立形象，基滙資本請咗曾代表智庫民主思路參與一六年立法會港島區直選嘅黃梓謙（Gary）擔任公共事務及市場總監，近月密鑼緊鼓進行地區「摸底」工作，話以往從政經驗對佢份新工好有幫助喎。
基滙資本喺本月廿八日正式接收領展十七個商場，關注團體對新業主持觀望態度。Gary話公司大批購入商場，但日後唔希望出現倒模式，希望每一個商場都有個別特色，受歡迎嘅小店必定保留，同時希望吸納跨區客，如定期舉辦展覽活動，吸引文青打卡，令屋邨商場都可成為熱點，帶旺人流。商場名稱同標誌仲設計緊，佢希望以貼地同親民為主。
至於商場翻新後會否加租，Gary話現階段唔敢作出承諾，公司並無急於回本，但停車場未來三個月唔會加租。