政情：政府屢爆醜聞 換新聞處長救亡

朱曼鈴黃智祖職位對調

官場音樂椅尋日再度轉動，然而今次嘅轉動非常罕有，係對調職位。政府宣布由現任旅遊事務專員朱曼鈴喺本月二十日出任新聞處處長，而現任嘅新聞處處長黃智祖同日出任旅遊事務專員。

按政府一般嘅做法，政務官喺某一個職位約三年就會調職，但黃智祖喺一六年七月出任新聞處處長，只係做咗年半就調離呢個位，情況確實有啲蹺蹊，不難令人懷疑同近期政府屢爆醜聞有關。至於朱曼鈴過往出任過多個部門，包括曾出任駐京辦主任，亦喺財經事務及庫務局同新聞處等做過，涉獵嘅範疇較為廣泛，相信今次調動係為咗救亡。