政情：運房局大安旨意 三跑開位甩轆

人事編制小組前日開會，運房局申請延長三名機場擴建工程統籌辦公室首長級官員任期，以配合機場三跑工程，但開位申請就喺五票贊成、八票反對下被否決。當時，副局長蘇偉文就喺立法會出席緊房屋事務委員會會議，相信喺人事小組委員會會議嘅運房局常任秘書長黎以德見到咁嘅結果都意外到「O嘴」。

三委員會同時進行唔夠人

事出必有因，今次甩轆嘅罪魁禍首就係運房局本身。局長陳帆面對高鐵一地兩檢呢個燙手山芋已經忙到一頭煙，開位申請呢啲嘢，本來就應由蘇偉文同主力政治游說協調工作嘅政治助理符傳富負責。前日立法會同一時間除咗有人事編制小組同房屋事務委員會開會外，衞生事務委員會亦都開緊特別會議。

一眾議員本身已經要喺幾個唔同會議室走嚟走去開會，適逢春節同立法會補選在即，部分議員唔係去咗寫揮春、出席地區活動就係幫候選人站台拉票，唔夠人開會本來係意料中事。不過當局就冇做好形勢評估，竟然冇叫建制派幫手，又難怪人哋冇坐定定嘅。

除咗當局漏招，有建制派議員就話人事編制小組委員會主席葉劉淑儀（葉劉）都有責任。皆因當日審議三跑開位前一個項目、即有關港珠澳大橋工程嘅開位申請時，建制派與會人數已經「掹掹緊」，最後喺三名民主派投棄權票之下，該申請先以九票贊成、八票反對，一票之差通過。奈何葉劉並冇意識到唔夠人，喺會議法定時間夠晒鐘，並冇結束會議，堅持延長會議時間十五分鐘，表決埋三跑項目開位嘅申請，結果就唔夠票通過喇！

副局政助歷練淺唔熟流程

但歸根究柢，運房局都係責無旁貸。老實講，蘇偉文係學者出身，舊年九月先至中途出家做副局長，符傳富連區議員都未做過，佢哋政治歷練尚淺，加上聞說佢哋同公務員並不咬弦，喺唔熟議會流程同生態，再加上在座嘅黎以德見唔夠人就應該叫停或拖延下，佢又冇睇實個場，終釀成今次災害。睇嚟佢哋都要經一事、長一智先得喇！