中環出更：不羈新形象黃家和獲高人指點
香港品牌發展局（品牌局）早前舉行品牌選舉頒獎典禮暨慶祝晚宴，講起省招牌，品牌局主席黃家和（Simon）特別有心得，佢最近就打造一個全新個人形象，唔染髮、全臉留鬚，仲趁做白內障手術而飛走戴咗幾十年嘅眼鏡添！佢笑稱呢個形象夠晒不羈，背後有高人指點添！
呢位高人就係中華廠商聯合會永遠名譽會長楊孫西。Simon笑笑口話唔染髮、留鬚已經差唔多一年，初初係因一個懶字，估唔到個個都話好睇，於是就順應民意喇！原本佢只係蓄短鬚，但最近獲楊孫西指點，話留番長啲啲，同埋放任啲鬚鬢自由生長，先夠入型入格，於是佢就變成依家咁「野性」嘅形象嘞！
現場仲有好多打造品牌嘅高手，包括品牌局理事黃偉鴻，佢自創嘅甜品新品牌今次都獲頒香港名牌獎項。得獎者仲有喺鯉魚門起家嘅涼果品牌，第二代傳人劉比利話盤家族生意已經做咗五十年，為咗跟上時代腳步，都要搞創新，包括爭取獎項嘅認同。佢笑稱為咗出席今次活動，身上着嘅西裝仲係佢呢世人第一次度身訂造，當年結婚都只係買現成咋！
老少聰笑談姓「老」趣事
身兼品牌局理事嘅香港生產力促進局副總裁老少聰都有出席，姓老好少見，唔知佢經常被人叫老先生會唔會唔開心？佢笑稱早已習以為常，反而老婆就好介意喎。佢話其實成日被叫盧生，最唔方便係訂枱時，若堅持話姓老係訂唔到枱嘅，所以佢索性投降話自己姓盧囉！
卓妮