政情：公民講場：何栢良 彭鴻昌唱雙簧 鬧爆增撥五億唔夠

寒流襲港加上冬季流感高峰期，公共醫療系統瀕臨爆煲，港府早前急補鑊向醫管局增撥五億元，港大感染及傳染病中心總監何栢良同代表病人權益嘅社區組織協會幹事彭鴻昌，尋日喺論壇上唱雙簧夾攻政府，其中何栢良表明醫管局每年經常性撥款超過五百億元，平均每日營運要花一至兩億元，反問只係畀五億元係咪計錯數？彭鴻昌亦話呢筆錢用嚟調整津貼，鼓勵醫護加班，對成效冇咩期望。其實公立醫院病人瞓出走廊唔係最近先發生嘅事，港府高官要拆解問題癥結所在，唔好以為增撥少少資源就可以過關。