政情：同場現身 許智峯 區諾軒疑破冰
南區區議員區諾軒退出民主黨前，同另外兩名南區區議員羅健熙及柴文瀚，被外界統稱為「區羅柴」集團，不時同身兼中西區區議員嘅白鴿黨立法會議員「峯鴿」許智峯大鬥法。適逢區諾軒早前舉行記者會宣布出戰立法會港島區補選，多名白鴿黨前黨友都有現身，恰巧峯鴿就冇現身，即時惹來外界聯想，直至尋日，區諾軒舉行街站再廣邀民主派同道中人撐場，峯鴿終於現身，疑同區諾軒破冰，並為早前冇現身區嘅記者會解畫。
為冇出席區記者會解畫
峯鴿聲稱，當日於旺角舉行嘅記者會時間撞正區議會會議，甫開會就打算去撐場，但到金鐘港鐵站月台時，就收到眾志秘書長黃之鋒嘅訊息，稱記者會已進入問答環節，建議若趕唔到就放棄，最終峯鴿預計趕唔切於是喺月台折返。峯鴿笑稱，「我識佢（區諾軒）仲耐過識（眾志）周庭」，表明會撐對方出選。
究竟峯鴿同區諾軒係「真‧破冰」，定係為大局先走埋一齊，時間將會證明一切。已報名參加港島區補選還有新民黨陳家珮、「維園阿哥」任亮憲 以及無黨派人士伍廸希。