政情：鄭承隆捍衞懲教投「CSD」 轟運署敏感度低

曾投同類車牌 斥多年冇檢討

行外人可能唔覺得「CSD」呢個車牌有咩特別，其實「CSD」同時係懲教署英文名「Correctional Services Department」嘅縮寫，最後經過逾廿口叫價嘅激烈競爭，鄭承隆身為懲教署轄下一個委員會嘅委員，最終以三萬二千元投得「CSD」呢個車牌。

鄭承隆事後話，今次競投係唔希望呢個車牌喺街上出現，佢投咗返去之後都只係會用嚟收藏，唔會攞嚟用，佢又批評運輸署處理自訂車牌嘅時候敏感度低、應該檢討，避免同政府部門縮寫有關嘅車牌流入市面，曾任監警會委員嘅鄭承隆反問：「唔通『HKPF』香港警隊又通過（作為自訂車牌）咩？」

睇番資料，原來早於二○一三年，曾經有一個同今次「CSD」類似嘅自訂車牌「CSD HK」拍賣過，當時更加引起懲教人員協會嘅不滿，協會仲要求過運輸署取消嗰個車牌嘅拍賣，不過最終拍賣如期舉行，當年以底價五千元投得呢個車牌嘅，亦都係鄭承隆。

鄭承隆透露，當年投咗「CSD HK」之後，車牌同樣一直「冇用過，放喺度」，今時今日再有「CSD」車牌拍賣，就反映運輸署多年來都冇檢討過車牌拍賣嘅安排。

運署：符合自訂車牌規定

不過，被點名批評嘅運輸署似乎態度照舊，發言人接受查詢時話，「CSD」車牌符合現行法例就自訂車牌所訂嘅基本組合規定，而運輸署署長於決定「CSD」嘅車牌申請時，經已全面、客觀同切實考慮相關法例所訂嘅審批準則、號碼組合可能帶有嘅含意，並顧及現行公眾對政府部門車輛及其展示嘅車輛登記號碼嘅認知、公眾表達意見嘅自由等，重申冇充分理據令運輸署署長審定「CSD」觸犯任何一項法例規定嘅審批準則咁話。