中環出更：上堂遊魂 返學遲到 羅台秦自爆老師冇佢符
近期有浸大學生因不滿個別校政，一度喺老師面前爆粗，仁愛堂早前喺馬場舉辦仁愛堂盃賽事，出席嘅政商界人士講起兒時趣事，就話幾曳都未試過用粗口鬧老師，身為浸大舊生嘅仁愛堂主席李愛平話，自己聽到呢件事都好傷心；仁愛堂副主席羅台秦亦話學生唔應該咁做，佢其後自爆讀書時都幾反叛，成日上堂遊魂同遲到，而一遲到就要喺門口罰企，甚至老師都發現佢不斷遲到，之不過好在本身功課都做得幾好，所以老師都冇佢符喎！
早陣子浸大一批學生佔領校內語文中心，表達對普通話豁免試合格率低嘅不滿，有浸大學生更一度衝口而出爆粗，本身係浸大舊生嘅李愛平話，浸大一向好淳樸，以往都唔會有呢啲事情。對於快將卸任主席，尋日帶埋三個孫出席活動嘅李愛平話，希望卸任主席後，可以多啲時間湊孫。
同場嘅羅台秦就自爆，以前讀書最曳頂多喺宿舍玩吓同飲吓酒，點會敢鬧老師，尤其當年資訊冇咁發達，學校嘅紀錄就更重要，如果被記大過，對於日後發展真係有好大影響。
後來做埋許友堅老師
另外唔講唔知，原來羅台秦都曾經為人師表，曾經喺香港科大教書，尋日佢亦帶埋以前學生許友堅（Maverick）嚟仁愛堂嘅活動，Maverick講笑話曾經走過羅台秦嘅堂，唔知佢講真定講假呢？
仁愛堂副主席陳達華就帶埋十三歲嘅囡囡出席，陳達華話，自己細個讀書都係一般，不過屋企好嚴，唔畀佢出街，所以細個做嘅曳事就係偷偷地出街。至於會否對囡囡一樣咁嚴格，陳達華透露幫囡囡報讀國際學校，一來壓力少好多，仲可以電曲髮同化少少妝都得添。
卓妮