政情：五音不全 麥美娟「咪嘴」高手
工聯會立法會議員麥美娟（Alice）早前出席會慶活動時，罕有地上台獻唱，睇落仲唱得有板有眼，點知原來係呃晒全場人。事後Alice透露，其實佢喺台上係「咪嘴」（假唱），仲充滿自信咁反問「係咪扮得好似？」原來佢「咪嘴」咁叻，皆因佢五音不全，背後仲有一段故事。
唱「生日歌」「數字歌」有信心
Alice話細細個就已經鍾意唱歌，可惜好快發現自己冇乜音樂天分，甚至可謂五音不全，加上喺卡拉OK亦都見過唔少「咪霸」，唱功平平但又要爭住唱，所以為咗避免自己都成為呢類人，就好少喺公開場合唱歌，亦都漸漸地練成咗「咪嘴」技能，既唔失禮，亦毋須獻醜。Alice仲話，依家佢有信心唱嘅歌，可能得「生日歌」同「數字歌」喎。